Furaha Moheli: Trundra la Nyunyi.

Monday 15 October 2012

Trundra la Nyunyi.

Trundra la Nyunyi

Ngeyina baandhwi za maha harimwa mudji mtiti, pvuka mundru akomuwamini Mungu akohiriwa Saidi. Suku mengoni mwa suku djiyoni adja mpangahari mdjini apvingi na trundra la nyunyi likana nkutsu, lipvereha pvereha alihentsi montsi.

Wandru wengi wamungaliya Saidi ha ushangavu wakati ahandisa ulaguwa.

“Pvodjana nikotembeya mdjini, tsiwono mwamtsa mundrumme akonidjeleya akodisa trundra la nyunyi lino. Ntsini moni mwa li trundra pvuka wana nyunyi wararu wa malavuni, wakoririnda ha baridi na faza.”

Tsimuziya yi mwamtsa ha umuwudzisa, “Yiyo ndrini uliyo nayo, mwana wangu?”

“Wana nyunyi tu,” adjibu.

Tsimuwudzisa “Utsowafanyiya ndrini?” Adjibu “Nitsowapvinga dahoni nitsolangadza na wawo.”

“Ngamwendo nawataanbishe na utowa yi mapuzi pare wawane. Nitsolangadza hawuzuri.”

“Tsi hale utsolemewa na zi nyunyi yizo. Utsowafanyiya ndrini wakati uwo?”

“Bas! Ngamuna wana mbaha,” arongowa yi mwamtsa. “Wawo upvendza nyunyi, nitsowapvawo.”

Saidi aruwa zi harimwa muda mshashi. “Ngotsaho riyali ngapvi dju la zi nyunyi zino, mwana wangu?”

“Hum! Ndrongo ndrini? Bwana, kuna udjipviwa na zi nyunyi zino, zilawa malavuni, yizo kazihedza, yizo tsi ndjuzuri!”

“Riyali ngapvi?” Saidi awudzisa mara ya pvili. “Mwamtsa yile amungaliya mundru mzima yile mawuri kasina ankili, arongowa, “Alifu mbili?” Saidi adzonyo muhono poshoni atowa riyali alifu mbili. Azihentsi harimwa u muhono wa yi mwamtsa. Mwamtsa yile ande dzahe sa yiyo kamwe.

Halafu Saidi arenge li trundra alipvingi mbole-mbole, atsengeleya bavuni mwa yi ndziya pvahano pvuka miri na malavu mengi. Ahentsi li trundra montsi, abuwa u mlango, areme yi zuma mbole-mbole. Wakati ule yi wana nyunyi walawa yipvo wapara nafasi.

Halafu Saidi ahandisa utowa hadisi yino.

Suku mengoni mwa suku Insa na Shetwani wakohadisi. Shetwani aka alawa duniyani, akodjisifu na zi mbi zikawo de azifanya.

“Ewa, Bwana, tsisiki wandru wengi swafi. Tsiwarandishiya, tsiwarumiliya ndrongo zikawo amba kawashinda wastahamili, tsiwapara piya.”

“Utsowafanyiya ndrini?” Insa amuwudzisa.

Shetwani arongowa, “Bas! Nitsokana furaha nyengi! Nitsowasomesa namna ya ulolana na ulawana, uyengana, uhadana, ulewa, uvura ciga, uvura bange.... Nitsowatriya harimwa zi ndrongo za pewu, niwabudzudze zi fikira na kakila ndrongo ndjuzuri. Nitsowasomesa heli mundru afanyawo bunduki na bombi yile pare wawuwane. Nitsolangadza hawuzuri!”

“Ndrongo ndrini de udjofanya nahika umalidza zi hazi zaho piya?” Insa amuwudzisa.

“Nitsowatowa roho piya.” Shetwani amungaliya Insa ha dzitso la pewu.

“Utsowatsaha ha djedje?” Insa amuwudzisa.

“Bas! Kusitsaha wandru wale. Wawo wandru wa pewu. Utsowapvendza be wawo watsohuyenga. Watsohutra mare na uhulana, warudi wahuwuwe! Kusitsaha wandru wale!”

“Ha djedje?” Insa amuwudzisa tsena.

Shetwani amungaliya Insa atsehe ha uteza sheri. Arongowa “Ngamutsaho yi mayesha yaho na yi damu yaho piya.”

Insa arongowa, “TSIKUBALI!” Wakati ule alipvi yi thamani…

No comments:

Post a Comment

Subscribe to: Post Comments (Atom)

Mipvenuliyo 5

Halafu tsiwono harimwa u muhono wa dadi wa yile akentsi harimwa yi shiri sha ufawume shile kiritasi yapverwa pverwa, yawandzihwa rangu moni ata mondze, tsena yisikidzwa na muhuri pvahano saba. Tsiwono malayika yendza ushindzi yikoshemeledza ha dji lendza nguvu ha uwudzisa: “Nani de astahiki upuwa yi mihuri yano, tsena abuwe yi kiritasi yino?” Be kapvwaka ata mundru rangu mbinguni, shipvandedju mwa ntsi, ata uzimu, akoshinda abuwe yi kiritasi yile yaka yapverwa, awu ayiwone tu moni ayisome. Wakati ule tsihandisa uliya ha utungu, ha yipvo yiliyo amba kapvwaka ata mundru akostahiki ubuwa yi kiritasi yile yaka yapverwa, awu ayiwone moni.

Markusi 10:45

Mana yi Mwana wa Mwanadamu wadjawu, waye kadja yile arumishiwe, be adja ha urumishiya na udjitowa fidiya afe ha ukombowa wengi wa wanadamu.

Mafilipi 2:7

…alishi yi daradja yahe yile, adjipva hali ya mrumwa, afanyishiha namna ya uka amba mundru ahimuwona, akowona mwanadamu.

Genèse 22:2

U Mwandzishiyo Muraharifu wa Mungu urihambiya: ‘Mana Mungu apvendze u ulemengu’, (ulemengu de wawe, wami na wanadamu wasaliya) ‘ata atowa yi Mwana modja modja wahe, amupveleha yile pare kula mundru amuwaminiwu asiangamiye, be ake na uhayati mukamilifu kawuna mpaka’." ³

Yuhani 3:16

Mana Mungu apvendze u ulemengu, ata atowa yi Mwana modja modja wahe, amupveleha yile pare kula mundru amuwaminiwu asiangamiye, be ake na uhayati mukamilifu kawuna mpaka.

1Yuhani 4:10

Tsiyano ndrongo yiwonesawo amba upvendza, yiyo ndrini: tse de amba wasi de rikomupvendza Mungu, bedi waye de akoripvendza, yipvo amupveleha yi Mwana wahe atolwe sadaka ha uripariya mswamaha wa yi madhambi yatru.

Yuhani 1:29

Tsilo sadaka la Mungu liliyo mfano modja na mwana gondzi atolwawo sadaka. Waye de atowawo yi madhambi ya li duniya.

Mahebraniya 7:26-27

Fundi wa Masadaka mawuri de uno de rikolazimu rike na waye, mundru aliyo amba waye muraharifu, kana kosa lidjoka lontsi wala panda, afahamishiwa na mafanyizi madhambi, ahedzwa udju raha na zi mbingu. Hahedju, tsi mpaka atowe Masadaka kula suku mawuri de yi Mafundi Malibwavu ya Masadaka yasaliya, rabuzi ha yi madhambi yahe, yipvo ha ya wandru wangina. Mana ndrongo yino ayifanya mara modja yikifiye piya zi suku wakati akodjitowa fidiya afe.

1 Yuhani 1:7-10

Be nahika mayendeleyo yatru, yawo ngeya hewuni mawuri de Mungu yipvo aliyo hewuni, basi pvapvo ritsowonehana amba hatrudju risikana yi mihono, yipvo yi damu ya Insa, yi Mwana wahe, yiliyo amba yikotriha utolwa yahe sadaka, damu yiyo urirahatsa yi madhambi yatru piya. Nahika ngerirongowawo amba karisina madhambi, basi pvapvo ngeridjihadawo nafusi zatru, yipvo zi kweli kazisi moni hatru. Be nahika rimukubaliya madhambi yatru yile ha upara mswamaha, madza yirahara amba waye muwaminifu, tsena wa haki. Basi atsoswamihi madhambi yatru na urirahatsa na kula ndrongo kayalazimu. Nahika ngerirongowawo amba karaparofanya madhambi, basi pvapvo ngerimufanyawo amba waye mnafiki, tsena urongozi wahe kawusi moni hatru.

Yuhani 1:12

Be ha kakula mundru amukubali,amuwamini na li dzina lahe, amupva ushindzi ha waye ufanyishiha mwana wa Mungu…

Lévitique 17:11

Mana u uhayi wa yi nyama ngowu harimwa yi damu. Tsimupvani yi damu harimwa u pvahano pva utowa li sadaka, pare yitowe yi madhambi yanyu; mana yi damu de yiswamihiwu yi madhambi ha sibabu ya u uhayi uliyo harimwa yi damu.

Matiyo 5:17

Musifikiri amba tsidja ha ulatsa nyuma zi ndrongo zi Shariya za Musa na yi miwandzishiyo ya yi mitrume zirongowawo. Be wami tsadja ha uzilatsa nyuma, be ha uzitimidza.

Makolosiya 2:15

U Mwandzishiyo Muraharifu wa Mungu urongowa amba Insa ‘atowa u ushindzi wa zi ndrongo za shi utawalizi na yezi za yizo kaziwonehanwa, azifedhehisha shandza na mandza ha uwonesa amba azishindi ha utolwa sadaka wa Kiristi harimwa muri wa mbawa.

1 Monye1:19-20

Mukombolwa ‘ha yi damu yendza kima nlibwavu ya Kiristi, aliyo mawuri mwana gondzi wa sadaka alingana, tsena kasina kosa lidjoka lontsi. Madza aka atsahulwa rangu kabula, kabula ya li duniya uwumbwa, be adja apvenulwa harimwa u wakati wa mwiso uno ha umufayidishani.’⁷

Mipvenuliyo 5:9

Tsilo Sadaka la Mungu liliyo mfano modja na mwana gondzi atolwawo sadaka. Waye de atowawo yi madhambi ya li duniya!’ ⁸

Maefeso 1:7

…uka utsindzwa ha utolwa sadaka, na ha yi damu yaho, umununuliya Mungu wandru ha ulawa harimwa kula kabila, harimwa kula luha, harimwa kula ntsi, na harimwa kula nishani.

1 Monye 3:18

Mana Kiristi waye waye ne afu mara modja ha ukifiya piya ha sibabu ya utsashiya wandru mswamaha wa madhambi. Mwenyewe uraharifu afu ha ukifiya wawo tsi waraharifu, yile aripvinge ha Mungu.

Yuhani 10:9

Insa arongowa: ‘Wami de u mlango. Mundru yontsi angiyawo ha unipviriya, yiyo atsohuyilwa…

Lukasi 24:39

Namungaliye yi mindu yangu na yi mihono, ha kweli amba de wami. Namunisike, muwone, mana mufu kakana nyama, wala ziba, mawuri de yi heli muniwonawo nazo.

Matiyo 27:50-54

Wakati ule Insa ashemeledza tsena ha dji lendza nguvu, yipvo roho yahe yilawa. Na pvapvo li suru laka lashukidzwa ha ufanya pesi moni mwa yi Nyumba Ndzitwaharifu ya umuanbudu Mungu lipasuha mabayi mayili, rangu udju ata mpaka ntsini; yi shipvande sha ntsi shidihi, yi madjabali yapasuha, yi mahaburi yabuha, na wandru waraharifu wengi waka wafa waregezewa hayi. Walawa mahaburini, na baanda ya u muregezeyo hayi wa Insa,wangiya u mudji muraharifu, pvahano pvuliyo amba wandru wengi wawawono. Wakati dhwamana wa yi madjeshi yale na yi wandru wahe wale wakomugodjeya Insa wawona yi shipvande sha ntsi namna shidihawo na zi ndrongo zile zadjiri pvale, waremwa na uhara. Warongowa: “Ha kweli, mundru yino aka de yi Mwana wa Mungu!